من سنين كتير ابتديت أخد كورسات في التربيه كتيره مع ناس مختلفين عشان أتعلم أحل المشكلات اللي بتقابلني مع أولادي واعرف إزاي أربيهم صح بشكل يحافظ على نفسيتهم السوية

بين كل الكورسات دي كان في دايما جزئية مشتركة ،وكانت هي أكتر جزئية بتدعمني ،

وهي اللي كانت بتتكلم عن الأم ، عن طرق وأنماط التفكير المختلفة ،عن الطباع ،عن أنواع الشخصيات وهكذا

وفهمت وقتها إني محتاجة أفهم نفسي كويس عشان أقدر أفهم أولادي وأربيهم؛ نفس مبدأ ساعد نفسك أولا عشان تقدر تساعد غيرك

ويعدي الوقت والدنيا تمام بس دايما كان في حاجة ناقصة ،

مرحلة كده كنت بحس إني بلف في دايرة مغلقة ،تايهة

مش بكمل حاجة للأخر ،بنضغط بسهولة ،إنتاجيتي وطاقتي بيقلوا كتير اوي ،عاداتي الجديده اللي بشتغل عليها ممكن تبوظ في موقف ضاغط أو مشكلة كبيره …

أنا كنت بسمي الوقت ده الدايرة السلبيه او الlow mode

وكان أقصى تطور بوصله إني لما أكون جوة الدايرة دي آقل احتكاكي باللي حواليا على أدّ ما أقدر عشان أفضل أم هادية ومتفهمه مش عصبيه وبتصرف غلط وأرجع أندم ..ولكن كانت النتيجة إني أم مزاجيه

ومهما حاولتي تداري ده عن أولادك فالأطفال أذكياء جدا عاطفياً وبيفهموا مشاعر وطباع اللي حواليهم وخصوصا أمهم .

وكانت النقطة الفاصلة والدالة على كلامي أما جت بنتي في يوم قبل ما تطلب مني حاجه بتسألني عن مزاجي النهاردة حلو ولا لأ

مودي كويس ولا وحش ؟وقتها اتأكدت إني مش مصدر أمان لولادي ولا حد يثقوا إنه موجود وثابت طول الوقت والقواعد واحدة والدنيا مستقرة ؛ لأ حد مرة يبقى تمام ومبسوط ومره عصبي وسلبي ..

وقتها قررت أتعلم أكتر عن إيه اللي بيدخلني في دايرة سلبيه بالشكل ده ؟إيه اللي بيستنزف طاقتي؟ إيه اللي بيضغطني؟ وليه مش بقدر أدير الضغط ده ؟إزاي أكون ثابتة ومستقرة نفسياً مش حبة فوق وحبه تحت ؟

دورت وعرفت وقتها عن الكوتشينج وابتديت أتعلم وشدني جدا

بعدها عرفت إن في حاجه اسمها العلاج المعرفي السلوكي

وده بالنسبه لي كان نقلة كبيرة وممتع وشيق لأقصى الحدود ووقتها

عرفت مبدأ بسيط ممكن يكون معروف وبديهي لناس كتير لكن بالنسبه لي كان فارق جدا !

إن أفكاري هي المسؤولة عن مشاعري وبالتالي تصرفاتي ..

وإني أنا عندي القوة في القدرة على إدارة مشاعري دي باختيار أفكاري وتغيير معتقداتي ،اللي بتكون ورا كل أفكاري ورؤيتي لأي موقف بمر بيه ،

فا لما أغير المعتقدات >أفكاري تتحسن وبالتالي> مشاعري وبالتالي يكون عندي القدرة على أختيار >رد فعل مناسب ليا واللي حواليا .

بس كدة

وأما فهمت نفسي واحتياجاتها بقيت قادرة أفهم اللي حواليا واتواصل معاهم بشكل أفضل وأعبر عن نفسي وأخطط بشكل يناسبني أكتر وكمان بقيت أفضل في التعامل مع مشاعري وده خلاها ثابتة ومستقرة و قلل ردود الأفعال الحادة فا بقيت حد ممكن يُعتمد عليه بشكل أفضل بالنسبه لأسرتي حد قريب وصديق وحد يثقوا فيه مش شخص موودي بتحركه مشاعره..

#Aya_Ali